مين يشتري حقي في بلادي
هتنازل عنه و هعلن موتي
موش بالساهل الاقي بديل
لكني كارهة لسكوتي
كل يوم شهدا واموات
ولا لاقية لطريقي دليل
حكومتنا عايشة في ثبات
في التكييف وعلي مكاتبهم
ويكنزوا اموال ع قلوبهم
واحنا يوماتي علينا ينداس
حادثة قطر اطفال في صعيد
ولا كنيسة في يوم العيد
تبقي كومة من الانقاض
ولا عريس وعروسته يكونوا
ضحية علي طريق الموت
كله بياخد وقت وعدي
وكأن ماكان حادث ودمار
بقينا نخاف من شكل النار
والدم حاسينه في ايدينا
والغدر شامينه حوالينا
ماهو بسكوتنا يبقي شاركنا
كل دمار حاصل حوالينا
كل مصيبة نقول دا خلاص
اخر تعداد للاموات
نلاقي الصدمة تتوهنا
ماهو لو حكومتنا ماتحمينا
يبقي بلاها نعيش في دنيا
ارخص مافيها الانسان
تربة وتتقفل وخلاص
مات فينا وبينا الاحساس
انا بايعة حقي في بلادي
وهعلن دلوقتي عن موتي
زي كل ضمير ماهو مات
لكني هدعي ومن قلبي
ارحمنا واغفر ياربي
الحق عندك مايضيعش
والموت بالموت
والعين بالعين
وقاتلهم لازم يتعاقب
وحكومة لازم يقيلوها
ونفوق من نومنا وكفاية
كل يوم افواج بتموت
كفاية علي قلوبنا الموجوعة
هناء محمود...ام عبير
Aucun commentaire:
Enregistrer un commentaire