شهيد 67

الشهيد البطل 

عبدالحميد طه عبدالحميد 

 ـــــــــــــــــــــــــــــــــــــ ــــــــ

طلعتوني من كوني ليه

اللي كنت عايش فيه

كنتوا سيبوني عايش مرتاح

في دنيا حواليا براح

إنتوا عايزين مني ايه 

أنا عملت اللي عليَّ 

ويوم ما بلدي نادتني

متأخرتش عنها ولا ثانية

أصل حبي لبلدي غيه

بس مكنتش أعرف إن ولادي

هايسيبوها ويغرقوا في الميه

ولا كنت أعرف إن فيها

شياطين ووساخه وحراميه

أنا كنت شايف كل الناس

ملايكه ولهم حق عليَّ 

وعلشانهم روحت شلت السلاح

وسيبت تلاميذي ومدرستي

وقلت حي على الفلاح

وبقى نشيدي في كراستي

وازاي هحس أنا بالأفراح

والقيود دي مكبله فراستي

أسست بنياني على التقوى

وقلت والله أبداً ما ارتاح

غير لما تعلى مؤسستي

وأقدم روحي لبلدي هدية

والشهادة دي تبقى عروستي

قتلت واحد واتنين ويمكن تلاته

وشربت مـن دم عدو غِتت غتاته 

واستني الشهادة تيجي ما تجيش

ف حلفت يمين وبالتلاته

ما راجع للفيوم في يوم

غير وانا شهيد في الجيش

فضلت أحارب لأخر رصاصة

ولما جاتني رصاصة من عدوي 

إستقبلتها في صدري بكل سعاده

وضحكت لما شفت الملايكه

بتجري عليَّ وبتهنيني بالشهادة

وكان آخر كلامي لحكام بلادي

حافظوا على بلادي وعلى أولادي

ومتسبهمش للجهل والفقر ضحية

إهتموا بالتعليم والصحة والإنسانية

هي دي وصيتي يالي بتقرو الوصية

ورجعوني لكوني تاني

 أصل بجد دنيتكم ضيقه عليَّ

شهيد 67 

 الشهيد البطل عبدالحميد طه عبدالحميد

بقلم شاعر الحدث 

الشاعر يوسف الحمله 

 6/5/2017